𝐎 𝐂𝐎𝐍𝐂𝐄𝐋𝐋𝐎 𝐃𝐀𝐒 𝐏𝐎𝐍𝐓𝐄𝐒 𝐈𝐍𝐅𝐎𝐑𝐌𝐀: "𝐂𝐈𝐓𝐀 𝐂𝐎𝐀 𝐇𝐈𝐒𝐓𝐎𝐑𝐈𝐀" 𝐅𝐀𝐑𝐀́ 𝐔𝐍𝐇𝐀 𝐏𝐀𝐔𝐒𝐀 𝐄𝐒𝐓𝐄 𝐀𝐍𝐎
O Concello das Pontes informa que este ano non se celebrará a actividade cultural "Cita coa Historia", organizada pola asociación @Lembranzadavila coa colaboración do propio Concello.
A decisión responde á vontade da asociación organizadora de tomarse un pequeno descanso, co obxectivo de retomar a cita o vindeiro ano cunha edición renovada, cargada de ilusión, forza e novas propostas que sigan poñendo en valor a nosa historia, o noso patrimonio e a nosa identidade como pobo.
Somos conscientes do inmenso esforzo que supón dar vida a esta celebración: tres días nos que A Vila se transforma grazas ao traballo incansable, a entrega e o compromiso de todas as persoas que forman parte de Lembranza da Vila, así como da colaboración desinteresada de moitas entidades, asociacións e veciñas e veciños que fan posible este evento tan querido. Comprendemos e respectamos a decisión de realizar este pequeno descanso.
Desde o Concello das Pontes e desde a asociación Lembranza da Vila queremos expresar o noso máis sincero agradecemento polo apoio, o cariño e a participación que, ano tras ano, amosa a cidadanía e todas as persoas que nos visitan durante esta cita tan especial.
Agardamos con ilusión o reencontro no próximo ano, para seguir facendo memoria xuntas e xuntos, celebrando o que somos e o que fomos.